Uppgjörið: Íslensk stjórnmál eru skrambi góð! - Opinn fundur 16. nóvember

Hvernig gerum við upp við fortíðina eftir efnahagshrun? Hvaða úrræði standa okkur til boða? Af hverju virka sum þeirra, en önnur ekki? Og hvernig tókst til á Íslandi?
 
Opinn fundur á vegum Stofnunar stjórnsýslufræða og stjórnmála þar sem Ragnar Hjálmarsson greinir frá þeim umbreytingarferlum (e. transitional justice mechanisms) sem hægt er að beita eftir efnahagsáföll, þá sérstaklega stofnun sannleiksnefnda, lögsóknum og réttarhöldum, kröfum um skaðabætur, og breytingum á stjórnarskrá.
 
Það er þekkt og hefur lengi tíðkast að gripið sé til slíkra úrræða í kjölfar hernaðar- og samfélagsátaka, en að þeim sé beitt eftir hrun sem er fyrst og fremst af efnhagslegum toga er nokkur nýlunda. Ragnar fer yfir hvað megi læra af nýlegri reynslu Íslands og annarra ríkja hvað þetta varðar, sem og af hverju uppgjör Íslands er einstakt í alþjóðlegum samanburði  ̶ og um leið alls ekki.
 
Erindi Ragnars byggir á niðurstöðum doktorsritgerðar hans „Transitional Justice after Economic Crisis“ sem hann varði nýlega við Hertie háskólann í Berlín, sem og niðurstöðum fjölþjóðlegs rannsóknarverkefnis,  „Accountability after Economic Crisis“, þar sem borin eru saman viðbrögð sex landa (Íslands, Írlands, Spánar, Portúgals, Kýpur og Grikklands) við alþjóðlegu fjármálakreppunni.
 
Ragnar Hjálmarsson er doktor í stjórnarháttum (e. governance) og starfar sem ráðgjafi fyrir Alþjóðagjaldeyrissjóðinn (AGS). Hann var skrifstofustjóri á skrifstofu AGS í Reykjavík og vann að framgangi efnahagsáætlunar stjórnvalda og sjóðsins. Þar áður starfaði Ragnar fyrir friðaruppbyggingarstofnunina Conciliation Resources og íslensku utanríkisþjónustuna.
 
Fundurinn verður haldinn þriðjudaginn 16. nóvember kl. 16:00 – 17:00 í stofu 101 í Odda, Háskóla Íslands. 
 
 
Fundinum stýrir Kristrún Heimisdóttir, lektor við Lagadeild Háskólans á Bifröst.
 
Öll velkomin.
 
3. nóvember 2021 - 14:00
Þú ert að nota: brimir.rhi.hi.is