Opinn fjarfundur: Ný lög um vernd uppljóstrara

Miðvikudaginn 15. apríl heldur Stofnun stjórnsýslufræða og stjórnmála opinn fjarfund, í samstarfi við Félag stjórnmálafræðinga, um ný lög um vernd uppljóstrara. Lögin (nr. 40/2020) tóku gildi um sl. áramót og gilda um starfsmenn sem greina frá upplýsingum eða miðla gögnum í góðri trú um brot á lögum eða aðra ámælisverða háttsemi í starfsemi vinnuveitenda þeirra, hvort sem þeir starfa hjá hinu opinbera eða á einkamarkaði. Markmið laganna er að stuðla að því að upplýst verði um lögbrot og aðra ámælisverða háttsemi og þannig dregið úr slíku hátterni. Starfsmönnum ríkis og sveitarfélaga er skylt að miðla upplýsingum og gögnum í slíkum tilvikum og sama á við um starfsmenn lögaðila sem eru að 51% hluta eða meira í eigu hins opinbera. Óheimilt er að láta starfsmann sem miðlað hefur upplýsingum eða gögnum í samræmi við ákvæði laganna sæta uppsögn eða skertum réttindum í starfi.
 
Fundurinn hefst kl. 12:30 og þar mun Oddur Þorri Viðarsson, lögfræðingur í forsætisráðuneytinu, kynna nýju lögin og Sigrún Jóhannesdóttir, lögfræðingur hjá innri endurskoðun Reykjavíkurborgar, segja frá nýrri rafrænni gátt borgarinnar fyrir uppljóstranir og nafnlausar tilkynningar. Áætluð fundarlok eru kl. 13:15.
 
Fundarstjóri verður Gústaf Adolf Skúlason, forstöðumaður Stofnunar stjórnsýslufræða og stjórnmála.
 
Hlekkur á Zoom-streymi: https://eu01web.zoom.us/j/64954304003
29. mars 2021 - 16:45
Þú ert að nota: brimir.rhi.hi.is