NÝTT NÁMSKEIÐ: Hvaða kröfur gera reglur stjórnsýsluréttar til stafrænnar stjórnsýslu?

Stofnun stjórnsýslufræða og stjórnmála kynnir:
 

NÝTT námskeið: Hvaða kröfur gera reglur stjórnsýsluréttar til stafrænnar stjórnsýslu?  

 
Námskeiðið verður haldið miðvikudaginn 19. maí frá klukkan 9:00 til 12:00. Við vekjum athygli á því að námskeiðið mun einungis fara fram í fjarnámi. Fjarnámið er sent út í beinu streymi en einnig verður upptaka af námskeiðinu aðgengileg tímabundið eftir að því lýkur. 
 
Umsjónarmaður og fyrirlesari er Kjartan Bjarni Björgvinsson, héraðsdómari við Héraðsdóm Reykjavíkur.
Þátttökugjald er kr. 18.700-
 

Þessu námskeiði er lokið. Ef áhugi er fyrir aðgangi að upptöku þess vinsamlegast hafið samband, stjornsyslaogstjornmal@hi.is

Markhópur
Stjórnendur, sérfræðingar og allir aðrir sem koma að og bera ábyrgð á að skipuleggja, þróa og halda úti stafrænni stjórnsýslu og lausnum á því sviði. 

Efni
Framfarir í upplýsingatækni eru eitt helsta áhersluatriðið í nútíma stjórnsýslu opinberra stofnana og sveitarfélaga. Stafrænar lausnir og rafrænt viðmót gagnvart borgurunum skapar tækifæri til þess að gera þjónustu hins opinbera bæði ódýrari og skilvirkari og á sama tíma mun aðgengilegri fyrir borgarana. Tækninýjungar á þessu sviði breyta því hins vegar ekki að reglur stjórnsýslu- og upplýsingalaga, sem og aðrar reglur stjórnsýsluréttarins, gilda áfram um samskipti stjórnsýslunnar við borgarana hvort sem þau eiga sér stað í stafrænni eða annarri mynd og að stjórnvöld verða að standast þær kröfur sem leiðir af þessum reglum. 
 
Í námskeiðinu verður farið yfir helstu áskoranir sem reynir á við innleiðingu stafrænna lausna út frá reglum stjórnsýsluréttarins og öðrum reglum sem við eiga, svo sem um persónuvernd. Meðal annars verður fjallað um álitamál sem tengjast skráningu upplýsinga og réttindum aðila máls samkvæmt stjórnsýslulögum þegar ákvarðanir eru teknar með stafrænum hætti, t.d. með atbeina algríms (e. algorithms). Þá verður fjallað um hvaða afleiðingar það kann að hafa ef aðferðir sem stjórnvöld nota á sviði upplýsingatækni eru ekki í samræmi við lög og reglur.
 
Kjartan Bjarni Björgvinsson er cand.jur. frá Háskóla Íslands og með meistarapróf í lögum frá London School of Economics and Political Science. Hann hefur m.a. annars starfað sem lögfræðingur við EFTA-dómstólinn, settur umboðsmaður Alþingis og formaður rannsóknarnefndar Alþingis. Kjartan hefur kennt stjórnsýslurétt og opinberan starfsmannarétt við Háskóla Íslands frá 2004 en var einnig dósent við lagadeild Háskólans í Reykjavík 2016-2018. Kjartan var skipaður héraðsdómari við Héraðsdóm Reykjavíkur í apríl 2015 og kjörinn formaður Dómarafélags Íslands árið 2019.
Þú ert að nota: brimir.rhi.hi.is